ទិវាស្រាវជ្រាវ បារាំង-កម្ពុជា ថ្ងៃទី២៩-៣០ មីនា ២០១៨
ស្ថានទូតបារាំង និងវិទ្យាស្ថានបារាំងនៅកម្ពុជា ក្នុងភាពជាដៃគូជាមួយសាកលវិទ្យាល័យ និងស្ថា ប័នស្រាវជ្រាវនានាដែលមានវត្តមាននៅកម្ពុជា នឹងរៀបចំទិវាស្រាវជ្រាវបារាំង-កម្ពុជាជាលើក ដំបូង។
ព្រឹត្តិការណ៍ខាងលើ ដែលមានគោលដៅលើកកម្ពស់ការស្រាវជ្រាវ និងលើកស្ទួយមុខអាជីពផ្នែកវិទ្យាសាស្រ្តនៅកម្ពុជា នឹងប្រារព្ធធ្វើនៅថ្ងៃទី២៩ និង៣០ខែមីនា ឆ្នាំ២០១៨ នៅភ្នំពេញ នៅវិទ្យាស្ថានបច្ចេកវិទ្យាកម្ពុជា (សាលាតិចណូ)។
ទិវាស្រាវជ្រាវនេះមានគោលដៅទាក់ទាញនិស្សិតកម្ពុជាឱ្យចាប់យកការស្រាវជ្រាវ ដើម្បីចូលរួមចំណែកអភិវឌ្ឍប្រទេសកម្ពុជា។ ទិវានេះលើកស្ទួយតម្លៃនិស្សិត អ្នកស្រាវជ្រាវវ័យក្មេង ការទន្ទឹងចង់បាន ទស្សនៈវិស័យ និងឱកាសរបស់ពួកគេ។ ព្រឹត្តិការណ៍នេះជាឱកាសសម្រាប់ជួបជុំ និងចងក្រងជាបណ្តាញរវាងតួអង្គនានាមកពីគ្រប់ទិសទី (រួមមាននិស្សិត អ្នកស្រាវជ្រាវ ស្ថាប័នផ្សេងៗ និងក្រុមហ៊ុន)។ ព្រឹត្តិការណ៍នេះនឹងជួយបញ្ជ្រាបឱ្យសាធារណជនបានយល់ដឹងអំពីការស្រាវជ្រាវ ធ្វើឡើងដោយស្ថាប័នបារាំងដែលមានវត្តមាននៅកម្ពុជា ជាមួយស្ថាប័នកម្ពុជា និងស្ថាប័នអន្តរជាតិ ដែលជាដៃគូ ហើយក៏ជាឱកាសមួយពិភាក្សាអំពីការចូលរួមចំណែកនៃការស្រាវជ្រាវ ក្នុងការអភិវឌ្ឍប្រទេសកម្ពុជា។ ទិវានេះក៏ជាឱកាសមួយសម្រាប់ជួយជ្រោមជ្រែងថ្នាក់ដឹកនាំស្ថាប័នរដ្ឋ និងផ្តល់ឱកាសក្នុងការពិភាក្សាផ្លាស់ប្តូរយោបល់អំពីប្រធានបទនានា និងបញ្ហាប្រឈមនៃការស្រាវជ្រាវនៅកម្ពុជា។
ទិវាខាងលើនឹងមានការចូលរួមពីសំណាក់និស្សិត និងអ្នកស្រាវជ្រាវវ័យក្មេង តំណាងស្ថាប័នគ្រឹះស្ថានឧត្តមសិក្សា និងស្រាវជ្រាវ រួមទាំងថ្នាក់ដឹកនាំមកពីស្ថាប័នរដ្ឋ។ ទិវានេះក៏ស្វាគមន៍ផងដែរដល់តំណាងស្ថាប័នសេដ្ឋកិច្ច និងសង្គម។
ទិវាខាងលើនឹងផ្តោតលើការបង្ហាញប្រកបដោយលក្ខណៈវិទ្យាសាស្រ្ត សន្និសីទ និងកិច្ចពិភាក្សាតុមូល ដែលមានការចូលរួមពីថ្នាក់ដឹកនាំនយោបាយ និងអ្នកជំនាញការផ្នែកវិទ្យាសាស្រ្ត រួមទាំងព្រឹត្តិការណ៍ផ្សេងទៀត (មានដូចជាពិព័រណ៍ ស្តង់ ការប្រកួតប្រជែង និងជំនួបពិភាក្សាផ្លាស់ប្តូរយោបល់)។
ភាសាប្រើប្រាស់ក្នុងអំឡុងទិវាវិទ្យាសាស្រ្ត៖ បទអន្តរាគមន៍នានា នឹងធ្វើឡើងជាភាសាបារាំង និងជាភាសាខ្មែរ (អមដោយការបកប្រែ)។
កាលបរិច្ឆេទ និងទីកន្លែង ៖ ថ្ងៃទី២៩ និង៣០ខែមីនា ឆ្នាំ២០១៨ នៅវិទ្យាស្ថានបច្ចេកវិទ្យាកម្ពុជា(សាលាតិចណូ)
សូមចុចត្រង់នេះ ដើម្បីមើលកម្មវិធី
អ្នកចង់ចូលរួមទិវានេះត្រូវចុះឈ្មោះជាមុន ឱ្យបានមុនថ្ងៃទី ១៦ ខែមីនា ឆ្នាំ២០១៨ តាមរយៈ ពាក្យចុះឈ្មោះ
ដើម្បីជ្រាបព័ត៌មានបន្ថែម សូមទាក់ទងទៅកាន់លោកស្រី ហ្វ្រេដេរីក រ៉េញេ តាមរយៈអ៊ីមែល frederique.reigney@diplomatie.gouv.fr ។
ការប្រកួតចំនួនបីប្រភេទ បើកទទួលបេក្ខជនចូលរួមប្រកួតប្រជែង៖
ក្នុងឱកាសទិវាស្រាវជ្រាវបារាំង-កម្ពុជា មានការរៀបចំព្រឹត្តិការណ៍ផ្សេងៗដើម្បីលើកស្ទូយតម្លៃនៃការងារស្រាវជ្រាវ និងគម្រោង ដែលមានលក្ខណៈបង្កើតថ្មីរបស់និស្សិត និងអ្នកស្រាវជ្រាវវ័យក្មេងដែលមានវត្តមាននៅកម្ពុជា។ កម្មវិធីនីមួយៗ មានការប្រកួតមួយ៖
- ការប្រកួតដណ្ដើមរង្វាន់ស្លាកផ្សព្វផ្សាយស្តីពីការស្រាវជ្រាវដែលល្អដាច់គេ ដើម្បីជ្រាបព័ត៌មានបន្ថែម និងដើម្បីដាក់បេក្ខភាពចូលរួមប្រកួត សូមចុចត្រង់នេះ
- ការប្រកួតដណ្ដើមរង្វាន់[ការបង្ហាញនិក្ខេបបទក្នុងរយៈពេល១៨០វិនាទីដែលល្អដាច់គេ] ដើម្បីជ្រាបព័ត៌មានបន្ថែម និងដើម្បីដាក់បេក្ខភាពចូលរួមប្រកួត សូមចុចត្រង់នេះ
- ការប្រកួតដណ្ដើមរង្វាន់«គម្រោងដែលមានលក្ខណៈបង្កើតថ្មីដែលល្អដាច់គេ» ដើម្បីជ្រាបព័ត៌មានបន្ថែម និងដើម្បីដាក់បេក្ខភាពចូលរួមប្រកួត សូមចុចត្រង់នេះ
ភាសាប្រើប្រាស់ក្នុងពេលប្រកួត៖ ភាសាដែលប្រើប្រាស់ក្នុងពេលប្រកួត អាចជាភាសាបារាំង ឬអង់គ្លេស។
ដៃគូ៖ ស្ថាប័នស្រាវជ្រាវ និងបណ្តុះបណ្តាល៖ វិទ្យាស្ថានប៉ាស្ទ័រនៅកម្ពុជា(IPC) វិទ្យាស្ថានស្រាវជ្រាវសម្រាប់ការអភិវឌ្ឍ(IRD) ទីភ្នាក់ងារបារាំងស្រាវជ្រាវជំងឺអេដស៍ និងជំងឺថ្លើម(ANRS) វិទ្យាស្ថានស្រាវជ្រាវស្តីពីអាស៊ីអាគ្នេយ៍សហសម័យ(IRASEC) វិទ្យាស្ថានបច្ចេកវិទ្យាកម្ពុជា(ITC) វិទ្យាស្ថានជាតិប្រៃសណីយ៍ ទូរគមនាគមន៍(NIPTICT)…។ល។
មូលនិធិ និងវិស័យឯកជន៖ Baca Villa (ហាងលក់ផលិតផលសរីរាង្គ) Sirea មូលនិធិ Mérieux ហាងBotanik Essence ក្រុមហ៊ុន Nokor Group ។ល។